By Abdulwahab Ibn Yusuf Isah IslamPidgin.blogspot.com
Make we no lie give ourselves. di way Islam take balance dis life sweet well well. For Qur'an, Allah tok say:
وَٱبۡتَغِ فِيمَآ ءَاتَىٰكَ ٱللَّهُ ٱلدَّارَ ٱلۡأٓخِرَةَۖ وَلَا تَنسَ نَصِيبَكَ مِنَ ٱلدُّنۡيَاۖ وَأَحۡسِن كَمَآ أَحۡسَنَ ٱللَّهُ إِلَيۡكَۖ وَلَا تَبۡغِ ٱلۡفَسَادَ فِي ٱلۡأَرۡضِۖ إِنَّ ٱللَّهَ لَا يُحِبُّ ٱلۡمُفۡسِدِينَ"
"And make you dey find di Hereafter (Darul-Aakhirah) with wetin Allah don give you. And No forget your portion of enjoyment for dis world. And make you de do good just as Allah don do good to you. And no dey find reason to cause fasaad (corruption/spoiling) for dis earth, because na correct truth say Allah no dey like people wey dey do fasaad (mischief/spoil things)".
(Surah Al-Qasas 28:77).
This verse dey show say Islam no tell us make we run comot from dunya. Instead, make we use am take do better thing wey go help us enter Jannah. Islam dey encourage make we find halal money, do business, build life, chop better food, wear better cloth, and waka with dignity as long say we no use am forget where we dey go. People like AbdurRahman ibn Awf and Uthman ibn Affaan, dem get money but dem still dey fear Allah and use their money support Islam. Prophet Sulayman sef get big kingdom and plenty wealth but he still serve Allah well. Even our Prophet Muhammad dey do business before Allah call am to be Prophet, and him be person wey people trust for trade.
So my people, to get money no be haram, to enjoy life no be sin, as long as na halal way and we no use am forget Aakhirah. Life na journey, dunya na road, but Jannah na destination.
Make we chop well, wear well, waka well but make we always remember say na Jannah be final home.